لكل واحده بتقرف من جوزها .. تعالى هنا
النهارده جيت اتكلم معاكم فى موضوع انا شايفاه مهم
الشكوى الا و هى
(( انا بقرف من جوزى ))
و دايما انا بستغرب من الكلام و بيبقى نفسى ارد علي صاحبه المشكله
لكن انا قلت احسن اجمع افكارى و اجي اناقشها معاكم
اولا
يعنى ايه واحده ست تقرف من جوزها ؟؟
اول حاجه هتيجى ف بالك ايه لما تشوفى موضوع زى ده ؟؟
يا اما الراجل ده شخصيه (سورى يعنى ) فعلا مقرفه و مش بيلتزم بقواعد النضافه الشخصيه
و فى الحاله دى الست معاها حق تيجى و تفضفض و تشتكى و نسمعها و نحل معاها مشكلتها
يا اما الست دى حامل و اى واحده حامل فعلا بتقرف من كل حاجه و من ريحه النفس و من جوزها شخصيا حتى و لو كان فله
و فى الحاله دى برضه معذورة
لكن لو مش احتمال من دول
اللى فيه الست تحكى انها بتقرف من الحاجات العاديه
.. تقرف تشرب مكانه ..تقرف تشيل مناديل استعملها ..
تقرف سورى لما يتف .. و هكذا
قبل اى حاجه تعالى اقولك كلمه:
تخيلى لو ف مرة لقيتى جوزك كاتب فى منتدى او ف اى مكان انه بيقرف منك ؟؟
هيكون ايه شعورك؟؟
اول حاجه هتسألى نفسك .. هو انا فعلا مقرفه ؟؟
هتلاقى الاجابه لاء .. انا نضيفه و زى الفل
امال ايه بقى ؟؟!!!!!
هتقولى هو مش بيحبنى و مش متعود عليا و عامل مابينا حواجز
مش صح اللى انا بقوله ؟؟
يبقى اكيد دى حاجه توجع اوى لو اكتشف انك قرفتى منه ف يوم من الايام
نيجى بقى ليكى
انتى اصلا بتقرفى ليه ؟؟
و خصوصا ان معظم المشاكل صاحبتها بتقول ان زوجها فى العموم نضيف
اللى تقول بيفضل يعطس و ينف فى المناديل و انا اشيلها مكانه
..و ايه يعنى يا ستى .. كلنا بيجيلنا برد
معنى كده ان هو لو لا قدر الله جاله مرض و رقد و استلزم الامر انك تغيريله و تغسلى مكانه هتقرفى ؟؟
لاء .. هتعملى كده بنفس راضيه ..بدافع حبك ليه
اعكسى الوضع و لو انتى اللى محطوطه ف الموقف ده هتستنى منه ايه ؟؟
و اللى تقول بيقعد ف البيت دايما بالهدوم الداخليه
ما يقعد براحته .. ماهو طول النهار متكتف بره و مرهق عشان يكفيكى
و بياخد راحته فى بيته
و انا مش شايفه ف كده حاجه مقرفه بصراحه !!!!
و اللى تقول بيتف ف الحمام و انا بانضف مكانه
انتى عارفه اصلا ان التواليت ده موضع الاذى
و انتى كده كده بتنضفيه و ربنا بيقدرك فرقت ايه بقى ؟؟
و اللى تقول بينسى يقفل باب الحمام لما يخرج و مش بيرجع الفوطه مكانها
يا ستى من ضمن شغل البيت كله اقفلى الحمام مش هيكلفك حاجه و رجعى الفوطه
كله بقى كوم و موضوع الغازات كوم تانى
اللى تقول ان فى واحد طلق مراته بسبب الموضوع ده و انها بتقرف من جوزها بسبب الموضوع ده !!!!!!!!!!!!
الله .. مش الموضوع ده حاجه موجوده ف كل انسان بتخلصه من الضرر !!!
و تصوروا لو عايشين مع بعض بشكل يومى هاتعملوا ايه ف الموضوع ده
و بالذات لو فى واحد من الزوجين مريض .. خلاص يعنى هنعلق لبعض المشانق
امال الواحد لو ماخدش راحته فى بيته و مع مراته هياخدها فين ؟؟
و غيره و غيره و غيره
خلاصه الكلام
لو انتى واحده من دول او زيهم
فاسمحيلى اقولك
انتى فاهمه الجواز غلط
و مش بتحبى جوزك بالقدر الكافى
اللفظ القرآنى بيقول لتسكنوا اليها
الجواز ده اتنين بيتكشفوا على بعض ف كل حاجه
بيشوفوا بعض ف كل الاوضاع
و مفيش بينهم اى عورات
كل واحد فيهم شاف من التانى اللى محدش ابدا شافه
و الاتنين ستر و غطا
مش اسمهم شريكين فى الحياة
دول حتى يتنفسوا نفس الهوا
مش كل حياتهم هيقضوها فى احراج و تحفظ
المفروض يكون بينهم الحب اللى يؤهلهم لده
يخلي كل واحد يتقبل التانى زى ماهو
مش احنا عندنا بيبهات ؟؟ و اللى مش عندها ربنا يديها باذن الله
مش البيبى بتاعك انتى بتحميه و بتغيريله
بتقرفى منه ؟؟
استحاله
لانك امه و اقرب حد ليه ف الدنيا ..
خلى جوزك زى ابنك و اقرب حد ليكى ف الدنيا
متتضايقيش لو قلع هدومه و مارجعهاش مكانها
كل الرجاله و الشباب و الولاد كده
ده مش اهمال
هما مش بيفهموا ف الحاجات دى
عشان كده احنا بنخدمهم سواء كانوا ولادنا او آباءنا او اخواتنا او ازواجنا
و كلنا بناخد راحتنا فى بيوتنا فليه بقى احنا مستكترين عليهم كده
نصيحه منى
لو فى لسه بينك و بين جوزك حاجز هديه و اقضى عليه
لو لسه بتتكسفوا من بعض خلى مفيش كسوف
لو حاسه انك بتقرفى منه
حبيه
ايوه حبيه
حبى تفاصيله و حبى ملامحه و شخصيته
و حطى ف بالك ان مفيش حد بلا عيوب
و لو حبيته بجد عمرك ماهتقرفى منه ابدا
بالعكس هتحسى بغلاوتك عنده لما يبقى معاكى على طبيعته و مرتاح
و مش هيجى اليوم اللى هنلاقيكى بتشتكى و تقولى
انا بقرف من جوزى
انا فعلا آسفه انى طولت عليكم
بس كانوا كلمتين نفسى اقولهم لكل صاحبه مشكله هنا
ليست هناك تعليقات:
إرسال تعليق