الأربعاء، 5 ديسمبر 2012

اوعى تكونى بتقولى كده لجوزك وانتم ...

كوني أنثى - اوعى تكونى بتقولى كده لجوزك وانتم ...

السلام عليكم ورحمة الله وبركاته
اسعد الله اوقاتكم بالخير يا قمرات..

هدخل فى الموضوع على طول واسفة على الاطالة
كنت عند دكتورة الاسنان مع اختى وطبعا انتم عارفين قاعدة الدكاترة والوقت الممل
وكان فى مجموعة من الستات بيتكلموا طول الوقت وبيخرجوا من موضوع لموضوع... لغاية ما جت سيرة الرجالة وبقت كل وحده تحكى عن نفسها وعن المشاكل ال بتحصل مع جوزها

يعنى كلام ممكن يضحك وكلام ممكن يضايق وهكذا..
لغاية ما اتكلمت وحده منهم وقالت - حصل بينى وبين جوزى مشكلة كبيرة ومن خنقتى وضيقتى قولتله ( انا بكرهك ومش طايقاك ) ومشى وسابنى وعمل كلمتى دى حجته فى هدم البيت- حاولت ارجعله وافهمه انى كنت مخنوقة وان الكلمة دى كانت من ورا قلبى بس هو مقتنعشى وما حاولشى انه يكلمنى ابداااا وبقى كل ال يجيلى من عنده يقولى ازاى تقوليله الكلمة دى..
بصراحة انا استغربت من كلامها اوى لان وقت المشاكل والزعل فى ناس مبتقدرش تتحكم فى نفسها او كلامها ومكنتش متخيلة ان الموضوع يكبر للدرجة دى..
المهم انى ما علقتش على كلامها بس لقيت ان فى ستات معترضه على موقف جوزها وفى ستات بيقولولها الكلمة دى صعبة ومينفعشى انها تتقال مهما كان..
الاغرب انى لقيت اخت تانية بتقول انها برضة قالت الكلمة دى لجوزها و وقتها حصل مشاكل بسبب الكلمة دى بس جوزها اتكلم معاها وفهمها ان اصعب كلمة ممكن تقولها الست لجوزها هى الكلمة دى
وبالرغم انه مر وقت طويل على الموضوع ده الا انه دايما بيفكرها انها فى يوم اهانتة وجرحته..
بصرف النظر عن موقف الزوجين المختلفين و طبعا انا قررت لما ارجع البيت اسال كل رجل اشوفه ( من اهلى طبعا) اساله عن الكلمة دى واثرها عليه هتبقى ايه لو مراته قالتهاله
معظمهم اجمعوا ان الكلمة بتخرج من الزوجة فى وقت الغضب الا انها كلمة صعبة جداا والمفروض انها متتقلش اصلا ولا للزوج ولا للزوجة..
حتى ان جوزى سالنى وانا بساله عن اثر الكلمة عليه وقالى - لو انا قولتلك بكرهك دلوقتى هتعملى ايه؟ طبعا لان الموضوع كان بهزار فانا ما اتكلمتش انما لو بجد فاكيد هيبقى شعور سىء
اخواتى واحبتى الفاضلات انا عارفة ان مفيش بيت خااالى من المشاكل ( ربنا يكفيكم شرها ويبعد عنكم الشيطان ) ولكن حاولوا انكم تمسكوا نفسكم عند الغضب
وحطوا خط تحت كلمة حاولوا والقصد منها الجمع ( انتى وجوزك ) لان الغضب وقذف الكلام السىء مش مرتبط بشخص معين
الحل...
المهم انكم ممكن تعملوا حاجة حلوة انا بعملها لو حسيت ان الوضع بينى وبين جوزى ممكن يتطور وعلى فكرة ده بالاتفاق مع جوزى
بسيبه وادخل اوضتى واشغل قران واعليه اوووى غصب عنكم هتلاقوا نفسكم هديتوا والامور ما اخدتش اكبر من حجمها..
ولا تنسوا حديث رسول الله
فعن أبي هريرة رضي الله عنه, أن رسول الله صلى الله عليه وسلم قال:
قال عليه الصلاة والسلام-: ليس الشديد بالصرعة إنما الشديد الذي يملك نفسه عند الغضب))
أخرجه البخاري ومسلم في الصحيح, ومالك في الموطأ

ليست هناك تعليقات:

إرسال تعليق